flux RSS

Benabar

Bruno Nicolini nasce di ghjugnu mil’è nove centu sessanta nove. Ingranda à Saintry-sur-Seine, in u dipartimentu di l'Essonne. Dopu avè ottenutu u so bascigliè, Bruno Nicolini principia à u sinemà cum'è tecnicu, realizeghja trè filmucci, è prova u ritrattu. Diventa scrittore per i filmi, è ancu s’ellu ùn hè micca cunnisciutu, participeghja à a scrittura di u telefilmu « La famille Guérin », è di a seria H per Canal +.

A vinti cinque anni, principia à scrive, à cumpone è à cantà. Autore di canzone pupulare, Bénabar conta soprattuttu ciò chì face a vita ughjinca. Si pruduce cun un amicu è inseme, inventanu un gruppu chì si chjama Patchol è Barnabé, i nomi di pagliacci. Patchol s’arresta di cantà è Barnabè diventa Benabar.

U so primu discu esce in u mil’è nove centu novanta sette, senza nome. U chjameremu « Bénabar et associés », u nome di u so primu gruppu. Ma st'opera ferma propiu discreta. In u duiemil’è unu, u so discu « Bénabar » hè più cunnisciutu è e so canzone si sentenu nant’à a radiu. A a fine di l’annata, face a prima parte di u cuncertu d’Henri Salvador è principia un giru in Francia.

In u duiemil’è quattru, ottene u premiu di u più famosu discu à e vittorie di a musica cù « Les Risques du métier ». Ma a cunsecrazione ghjunghje unu annu dopu, cù u discu « Reprise des négociations ». Michel Denisot li rimette un triplice discu di platinu, durante l’emissione « Le grand journal » in duiemil’è sei, è Daniela Lumbroso li rimette un discu di diamante l'annu dopu.

Di marzu duiemil’è sette, ottene dui premii à e vittorie di a musica: quellu di l’artistu di l’annata è quellu di a canzona uriginale di l’annata, cù « Le Dîner ».

U discu « Infréquentable » esce in u duiemil’è ottu, cù a famosa canzona « L’effet papillon ».

L’annu dopu, Bénabar rivene à u sinemà, in u filmu « incognito » cù Franck Dubosc, Jocelyn Quivrin è Isabelle Nanty. Benabar ghjoca un cantadore chì cunnosce un veru successu, arrubbendu e parulle di e canzone à un altru. U filmu è l’attore Benabar anu u successu.

Ma Benabar ghjoca dinù à u teatru. In u duiemil’è ondeci, Isabelle Nanty li prupone a pezza « Quelqu’un comme vous », cù Jacques Weber è scritta da Fabrice Roger Lacan. E riprisentazione à u teatru di u Rond Point di i Champs Elysées sò un veru successu è un giru in pruvincia hè urganizatu.

Dopu stu giru, Benabar principia l’arregistramentu di u so discu « Les bénéfices du doute », chì esce di dicembre duiemil’è dui, cù a racolta di i so testi « Travaux Publics ». 

In listessu tempu, Benabar canta una di e canzone di u filmu d’animazione Car 2, « quand mon cœur fait vroum ».

Bénabar hè dinù indiatu : in u duiemil’è quattru canta cù Sanseverino a canzona « A ma fenêtre » per u discu « Ensemble contre le Sida », in u duiemil’è sei canta « L’or de nos vies », scritta da u gruppu Fight Aids, in u duiemil’è sette participeghja à u Symphonic Show di u Sidaction è à a manifestazione « Touche pas à mon ADN », urganizata da Charlie Hebdo è SOS Racisme, eppo canta cù « Les Enfoirés » dapoi u duiemil’è sette.