flux RSS

Garou

Pierre Garand, dettu Garou, hè natu in Sherbrooke à u Québec. Sona parechji strumenti cum'è u pianoforte, a chitarra è l’organu. Principia à cantà in u caffè Liquor Store, tutte e dumeniche. Cù a so voce particulare, canta soprattuttu u Blues. Ghjè in stu caffè ch’ellu scontra à Luc Plamondon. Dopu un’audizione diretta da Richard Cocciante, Garou diventa u persunaghju di Quasimodo in a cumedia musicale « Notre Dame de Paris ».  A canzona « Belle » li face ottene un premiu à i World Music Awards è à e vittorie di a musica, eppo a cumedia u face cunnosce in Francia.  

In u duiemila, dopu u successu di a comedia musicale « Notre Dame de Paris », Garou principia una carriera in solò cù u discu « seul » realizatu da famosi cumpunidori è cantadori: Luc Plamondon, Richard Cocciante o Didier Barbelivien. Canta dinù cù a canterina Céline Dion, a canzona « Sous le vent ».  L’annu dopu, esce u discu in direttu « Seul avec vous » cù a ripresa « Le monde est stone ». Sò ondeci mila spettatori presenti à u so cuncertu in Bercy. A listessa annata, nasce a so figliola Emelie.

Di marzu duiemil’è trè, Garou face esce u so secondu discu « Reviens », cù una canzona cantata cù Michel Sardou « La rivière de notre enfance ». Principia un giru chì durerà un annu sanu. Dopu à stu giru Garou si riposa appena è piglia u tempu à pensà à u so prossimu discu.

In u duiemil’è cinque, canta cù a canterina Marilou « Tu es comme ça ». Cunnoscenu un veru successu, è a canzona si ritrova à a decesima piazza di a classifica. I primi dischi sò produtti da René Angeli, u maritu di Céline Dion.

In u duiemil’è cinque, Garou hè u primu invitatu di l’emissione « L’école des fans », in a versione di u Québec ! U so terzu discu esce l’annu dopu, intitulatu "Garou". In stu discu, ritruvemu e canzone « L’injustice », scritta è cumposta da Pascal Obispo, è « Que le temps », scritta da Sandrine Roy, nant’à una musica di Sylvain Michel. Stu discu hè particulare per via di u tema ch'ellu sviluppa: u tempu. Si cumpone di dodeci tituli, cum’è e dodeci ore d’ un rilogiu.

In u duiemil’è ottu, Garou travaglia nant’à un discu in inglese « Piece of my soul ». Parechji cantadori è cumpunidori participeghjanu à stu discu : Rob Thomas, Kristian Lundin, Andreas Carlsson o Guy Chambers. Stu discu esce di maghju duiemil’è ottu. A più grande parte di e tredeci canzone sò realizate da Peer Astrom, unu di i più famosi pruduttori di pop-rock, cunnisciutu per u so travagliu cù Madonna o Jennifer Lopez.

In listessu tempu, Garou ghjoca in una comedia rumantica « L’amour aller retour », realizata da Eric Civanyan.

In u duiemil’è nove, esce un discu di riprese: « Gentleman Cambrioleur », cù e più famose canzone inglese è francese.

U so sestu discu « Version intégrale », esce in u duiemil’è dece. Per stu discu, Garou participeghja à qualchì scrittura, sona parechji strumenti, è sopravede a pruduzzione.

Garou crea tandu a so propia casa di pruduzzione Wolfgang è face piantà a so cullaborazione cù René Angeli. Garou pruduce i so dischi ma dinù quelli di a canterina Lorie.

Garou ùn face micca chè cantà. In u duiemil’è ondeci, Garou hè u persunaghju magiore di u spettaculu di u Cirque du Soleil, Zark. U spettaculu si ghjoca à u Radio City Hall in New York.

Dapoi u duiemil’è dodeci, face parte di a ghjuria di l’emissione  « The Voice », nant’à TF1.

In listessu tempu, esce u so ultimu discu « Rythm and Blues » cù una canzona dedicata à a so figliola Emelie, scritta da Jean Jacques Goldman. A canzona hè chjamata "For You".

Una settimana dopu a so esciuta, u discu diventa discu d’oru, è ottene u premiu di a canzona di l’annata duiemil’è dodeci, nant’à TF1, cù a canzona « Le jour se lève »

Garou hè dinù un cantadore indiatu : in u mil’è nove centu novant’ottu, participeghja à i dischi « Ensemble contre le sida », è  "2000 et un enfant". Face parte dinù di a squadra di « les Enfoirés » dapoi parechji anni.