flux RSS

Hélène Segara

Hélène Segara hè nata u vinti sei di ferraghju mil’è nove centu settant’unu in Six Fours, in u dipartimentu di u Var. A quindec’anni, si ne và da a casa paterna è si face sbabbà. Ciò ch’ella brama di più hè di cantà. Principia in i caffè di u sudu di a Francia. Per ella, ste serate sò e più difficiule di a so carriera, mà sò dinù e più furmatrice perchè ci vole à cunnosce e millaie di canzone è cantà davanti à un publicu ch’ùn sta miccà à sente veramente a musica. Di fattu, ci vole à seducelu.

In u mille nove centu ottanta nove, nasce u so primu figliolu Raphaël. Hélène Segara hà diciottu anni.

In u mil’è nove centu novanta sei, Hélène Segara colla in Parigi cù u so figliolu, per cambià di destinu. Dopu qualchì annu senza successu, Hèlène Segara scontra à Christian Loigerot, unu di i scrittori di Céline Dion, è soprattuttu scontra à Orlando, u fratellu di Dalida, chì diventerà u sopru duttore qualchì annu dopu.

In u mil’è nove centu novanta sei, esce u so primu discu « cœur de verre ». Hélène Segara ùn s’assumiglia micca à e canterine di l’epica. Hè di generu classicu è canta e canzone rumantiche, allora chì ghjè a moda di u rap è di i Boys band. Malgradu u so stile, u so discu cunnosce u successu, soprattuttu cù a canzona « Je vous aime adieu », ch’ella hà scrittu. Cù sta canzona riceve u premiu Rolf Marbot l’annu dopu. Mà ghjè a so canzona cù Andrea Bocelli, « Vivo per lei » chì a face cunnosce in u mondu sanu.

U successu ùn s’arresta micca cù a canzona « Vivo per lei ». Hélène Segara diventa u persunaghju d’Esmeralda in a cumedia musicale « Notre Dame de Paris », composta da Luc Plamondon è Richard Cocciante. Hélène Segara rimpiazza a canterina Noa. Trà sittembre mil’è nove centu novant’ottu è maghju duiemila, Hélène Segara face più di quattru centu riprisentazione.

Mà durante u giru di a cumedia musicale « Notre Dame de Paris » in u Canada, Hélène Segara hà una gubbia in gola chì l’impedisce di cantà è deve fassi operà. Ghjè durante stu mumentu difficiule, chì u pruduttore Orlando li face firmà un cuntrattu di 4 anni. Hélène Segara ritrova cunfidenza è ripiglià à cantà. In u duiemila esce u so secondu discu « Au nom d’une femme », cù e famose canzone « Il y a trop de gens qui t’aiment », « Elle, tu l’aimes », « Parlez moi de nous » o « Tu vas me quitter ». Cù u so discu, Hélène Segara ottene u premiu di a più famosa canterina di l’annata à e vittorie di a musica in duie mil’è unu. A listessa annata, raghjunghje a squadra di Les Enfoirés.  

Populare, semplice è naturale, Hélène Segara diventa a canterina preferita di i francesi. In u duie mil’è trè, esce u so terzu discu « Humaine ». Ancu si Hélène Segara canta sempre e canzone rumantiche, e so canzone sò più pop cume « On n’oublie jamais rien, on vit avec », cantata cù Laura Pausini. A listessa annata, sposa à Mathieu Lecat in Aiacciu. Anu dui figlioli inseme : Matteo natu in duie mil’è trè è Maïa in duie mil’è quattru.

In u duie mil’è sei, esce u so discu « Quand l’éternité ». Stu discu hè più persunale, marcatu da a nascita di i so dui figlioli, è a morte di u so soceru. Hélène Segara hà scrittu a maiò parte di e canzone, cù u so maritu cumponidore. Stu discu hè discu d’oru cù più di duie centu mila dischi venduti. U discu hè sempre un successu cù e canzone « Méfie-toi de moi », « Rien n’est comme avant » mà dinù « Father ».

In u duie mil’è ottu, canta « La moitié de nous » cù Bruno Pelletier. Una parte di u benefiziu di a vendita di stu discu, hè data à l’associu « Rêves ». A listessa annata, esce u so discu « Mon pays c’est la terre », cuntenendu riprese di canzone di sfarenti paesi. Ma stu discu ùn cunnosce micca u successu.

In u duie mil’è dece, Hélène Segara prisenta l’emissione « Allo Gulli, ici bébé » nant’à a scena Gulli.

Dopu st’emissione, u gruppu iniziale di a cumedia musicale « Notre Dame de Paris » si forma torna è dà qualchì cuncertu in Kiev, Moscou è Saint Petersbourg. L’uccasione di ritruvà i so amichi Garou, Patrick Fiori, Julie Zenati o Daniel Lavoie. Un annu dopu, a truppa si ritrova per 3 cuncerti in Bercy, accumpagnata da quaranta curisti.

In u duie mil’è ondeci esce u so discu « Parmi la foule » cumpostu di dodeci canzone, trà e quale quella scritta da u so maritu Mathieu Lecat « La vie avec toi » è quella cantata cù u so figliolu, « Un monde à l’envers ».

Cù e so canzone d’amore, Hélène Segara hà ottenutu parechjì premii : dischi d’oru per « Je vous aime adieu, Les vallées d’Irlande, parlez moi de nous, tu vas me quitter, l’amour est un soleil » è « on n’oublie jamais rien on vit avec », dopu hà avutu un discu di diamante per « vivo per lei » è un discu di platinu per « Elle tu l’aimes ».

Hélène Segara hè dinù una canterina indiata : face parte di a squadra di « Les enfoirés » dapoi duie mil’è unu, hà cantatu « L’amour existe encore » cù Garou per u discu « Ensemble contre le sida », hè a cumare di u Phonéthon duie mil’è nove per sustene i prugetti umanitarii in Arménia è in l’altu-Karabagh, hè a cumare di l’associu Espace adoption, hè l’imbasciatrice di l’associu Rêves dapoi dece anni è sustene l’associi Les restos du cœur, Les enfants de la terre è e-enfance.

Per finisce, ci vole à sapè dinù chì Hélène Segara hè stata numinata à u gradu di cavalieru in l’ordine di l’arti è di lettere, di ghjennaghju duie mil’è ondeci.