flux RSS

Les Négresses Vertes

Nanzu a nascita di u gruppu, i so membri eranu inde un'altra furmazione : Mathias, Paulo è Gaby facianu parte di u gruppu punk « Les Maîtres », allora chì Noël Rota hè statu cantadore inde u gruppu « Les Béruniers Noirs ». Si scontranu in e feste parigine.

U nome « Les négresses vertes » vene da una baruffa in un ballu in u mil’è nove centu ottanta sette, cù certi omi avendu capelli verdi. I surveglianti avianu messu fora unepochi stridendu « Sortez les negresses vertes ! »

U gruppu sona in u metro è in i carrughji di Parigi. Certe volte, sò sin’à nove cantadori! U so primu discu hè prestu un successu. Intitulatu « Mlah », esce in ottant’ottu. Duie canzone sò assai cunnisciute : « Zobi la mouche » è sopr’à tuttu « Voilà l’été ». A so musica hè allegra è festosa.

Les négresses vertes ùn anu micca solamente u successu in Francia, ma dinù in u mondu. Durante unu di i so cuncerti in Inghilterra, scontranu a canterina Madonna. E so canzone li piacenu è Madonna li dumanda di cantà nant’à a musica di u filmu « Dick tracy ».

U secondu discu di « Les négresses vertes » esce in novant’unu, intitulatu « Famille nombreuse ». Ci ritruvemu e canzone « Sous le soleil de Botega », « famille heureuse », « La France a ses dimanches » o « Hou mamma mia ». Facenu parechji cuncerti, in Europa ma dinù in u mondu. Sò invitati à cantà in Beyrouth, per u primu cuncertu dapoi a fine di a guerra, in u mil’è nove centu settanta cinque.

In u novanta trè, esce u terzu discu ma micca nove canzone. Stu discu ghjè un « remix » (una nova orchestrazione) di e so più famose canzone, fattu da i più famosi DJ.

U listessu annu, unu di i cantadori, Noël Rota, more di droga. Sta sparizione hè una tragedia per u gruppu, chì ùn canta più durante dui anni.

In u novanta cinque, « Zig Zague » hè u novu discu di u gruppu « Les négresses vertes », chì hà solu cinque membri oramai. Vanu in parechji festivali, « le printemps de Bourges », « Les francophonies de la Rochelle ».

In u novanta sei, participeghjanu à a realizazione di u novu discu di Jane Birkin. Ripiglianu a canzone di Serge Gainsbourg « La gadoue», è pruponenu una nova versione, cantata da Jane Birkin.

U gruppu « Les Négresses vertes » s’arresta torna qualchì annu, è rivene nant’à a scena in u novanta nove, cù « Trabendo ». Stu titulu vene da a parlata pupulare di l’Algeria, chì conta u cuntrabandu trà Alger è Marsiglia.

Stu discu ùn hè micca un successu è pianu pianu, u gruppu diventa un gruppu scunnisciutu. Ancu s'ellu ùn hà più successu, Les Négresses vertes ottenenu un premiu à e vittorie di a musica in l’annata duiemila!

In u duiemil’è unu, ripiglianu e so più belle canzone, e cambianu è facenu u so quintu discu « Acousting Clubbing ». U megliu di e so canzone, « Le grand déballage », esce un annu dopu, ma u gruppu si sface.