flux RSS

MC Solaar

U cantadore di rap MC Solaar hè natu in Dakar, u cinque di marzu mil’è nove centu sessanta nove. I so genitori venenu da u Tchad, è scalanu in Parigi quandu Claude M’Barali, (MC Solaar) hà sei mesi. Campanu in Saint Denis, ma u babbu volta à u Tchad qualchì annu dopu, è ghjè a mamma chì alleva i zitelli. Mc Solaar stà qualchì mese in Egypte è volta in Francia per ottene u so bascigliè. Dopu, face i studii d’inglese, di spagnolu, di Russiu è di filosufia.

Ma a musica l’hè sempre piaciutu. D'estate mil’è nove centu novanta, arregistra qualchì canzona cù u so amicu Jimmy Jay, è a più famosa « Bouge de là », induv’ellu ghjoca cù e parulle. Cù sta canzona, MC Solaar ottene una vittoria di a musica. Un annu dopu, esce u discu « Qui sème le vent récolte le tempo », chi serà un veru successu.

I testi di e so canzone sò cerbelluti, pertinenti è Mc Solaar ghjoca cù e parulle. Li piace a litteratura è si sente inde e so canzone. In novanta dui, gira in Pologna, in Russia è in dodeci paesi d’Africa.

Participeghja dinù à i cuncerti di l’urganisazione « Amnesty International » chì festighjeghja i so trent’anni. U so secondu discu « Prose combat » esce in u mil’è nove centu novanta quattru è si vende in furia. Mc Solaar diventa un cantadore ricunnisciutu à u livellu internaziunale. E canzone più cunnisciute di stu discu sò « Nouveau Western », « Obsolète » è « La concubine de l’hémoglobine », una canzona chì conta cume MC Solaar vede u mondu di a guerra. 

In u mil’è nove centu novanta cinque, MC Solaar ottene u premiu di u più famosu cantadore à e vittorie di a musica. Gira in Francia è in Auropa, ma durante u giru, si stacca da u so amicu è cullaburadore Jimmy Jay. In novanta sette, esce u so terzu discu « Paradisiaque ». MC Solaar scrive i testi nant’à una musica di Hubert Blanc Francard, dettu Boom Bass è Philippe Zdar, chjamatu Funk Mob, ma per a prima volta, senza Jimmy Jay.

Un annu dopu, face cuncerti nant’à a scena di l’Olympia è arregistra u so primu discu live « Le tour de la question ». Participeghja dinù à u festivale di Cannes, cum'è membru di a ghjuria, direttu da Martin Scorcese.

Qualchì mese dopu a surtita di u discu « Cinquième as », in u duiemil’è unu, MC Solaar principia un giru di Francia, passendu per u Zenith in Parigi. Un bellu spettaculu chì cunnosce un veru successu, cum'è u discu, cù e canzone « Hasta la Vista », « RMI », « Solaar pleure » o « Baby love ». E canzone di stu discu sò tutte sfarente, certe legere, altre più serie o più dure. In qualchì mese, hè u decesimu discu u più vendutu in Francia. Ma in u duiemil’è sei, u discu hè cacciatu da u cummerciu perchè MC Solaar hè accusatu d’avè cupiatu vint’ottu note di musica di a canzona « La marchande d’allumette » scritta da Gérard Layani in mil’è nove centu sessanta sette, ind’è a so canzona « La la la ». 

In u duiemil’è dui, MC Solaar participeghja à i cuncerti di « Les Enfoirés », è canta sempre cun’elli. « Mach 6 », hè u so sestu discu. I testi sò sempre ben scritti, ma a musica cambia è u rap diventa più hip hop.  I primi ghjorni, MC Solaar distribuisce trè centu mille dischi à a ghjente, à a surtita di u Metro pariginu. Mà sti dischi ùn duranu micca più di sette ghjorni, dopu ci vole à compralu. Mc Solaar face st’uperazione per mostrà à a ghjente i prublemi di u caricamentu illegale di e canzone nant’à a tela.

L’ultimu è settimu discu di MC Solaar, hè intitulatu « Chapitre 7 » è esce in u duiemil’è sette.  Stu discu hè più affanosu, parlendu di l’attualità, aspessu viulente di u mondu. A prima canzona stratta da stu discu hè « Da Vinci Claude ». In u duiemil’è ottu, scrive a canzona « Le rabbi muffin » per a cumedia musicale « Les aventures de Rabbi Jacob » diretta da Patrick Timsit. Ora, MC Solaar prepara un prussimu discu ma ùn si sà ancu per quandu…allora aspettemu !