flux RSS

Vanessa Paradis

A canterina hè nata u vinti dui di dicembre di u mil’è nove centu settanta dui in Saint Maur des Fossés, in u Val de Marne. Vanessa Paradis hè dinù cunnisciuta cum'è attrice. Hè a nipote di u pruduttore è attore Didier Pain. Da zitella, Vanessa Paradis ampara u pianuforte, balla, è face qualchì audizione per esse manicchinuccia.

S'affacca pè a prima volta à a televisiò à nove anni, in l’emissione « L’école des Fans », animata da Jacques Martin. Canta una canzona di a cumedia musicale « Emilie jolie ». Per via di u so ziu Didier Pain, Vanessa Paradis cunnosce prestu u mondu artisticu, seguitendulu nant’à a scena musicale.

In u mil’è nove centu ottanta trè, arregistra a canzona « La Magie des surprises parties », scritta da « les Forbans », è face parte di u coru, cantendu duie canzone di u discu di Franck Langolff.

Ma a so carriera principia in ottanta sette, cù a famosa canzona « Joe le Taxi », scritta da Etienne Roda-Gil è Franck Langolff. A quattordeci anni, Vanessa Paradis ferma ondeci settimane à a prima piazza di u Top 50 !, è diventa famosa in altri paesi : Belgica, Canada, Sguizzera, Inghilterra è Israël ! A canzona hè tradutta ancu in spagnolu ! Quand'ellu hè compiu u so sfruttamentu, u dischettu « Joe le Taxi » s’hè vendutu à più di trè milioni in u mondu !

In u mil’è nove centu ottant’ottu, esce u so primu discu « M&J » cù e canzone, « Marilyn & John, Maxou, coupe coupe o Mosquito ». Cù u successu di « Joe le taxi », stu discu M&J sorte in parechì paesi, mà i risultati ùn sò boni chè in Francia. L’annu dopu, durante l’emissione Fréquenstar, prisentata da Nagui, u cantadore Serge Gainsbourg face sapè ch’ellu vole travaglià cù Vanessa Paradis. Nagui a li prisenta. Per u so secondu discu, « Variations sur le même t’aime », Serge Gainsbourg li scrive tutte e parolle. Stu discu cunnosce u successu cù e canzone « Tandem, Dis lui toi que je t’aime è l’amour en soi ».

U terzu discu di Vanessa Paradis nasce da una cullaburazione cù Lenny Kravitz. U discu sanu hè cantatu in inglese è e più famose canzone sò « Be my baby, sunday mondays è natural high ». Ghjè un successu, soprattuttu in Francia. Cù stu discu, Vanessa Paradis principia u so primu giru, cù più di sessanta date in Francia, ma dinù à u Canada è in Inghilterra.

In principiu di l’annate novanta, Vanessa Paradis canta dinù cù parechjì artisti : canta cù l’associu « Pour toi Arménie », avviatu da Charles Aznavour, canta una di e canzone di u filmu « Atlantis » realizatu da Luc Besson, è face u coru in parechje canzone di Johnny Hallyday, Alain Lanty o Louis Bertignac. Trà novanta trè è novanta nove, face parte di a squadra di « Les Enfoirés ».

In mil’è nove centu novanta cinque, à a ceremonia d’apertura di u festivale di Cannes, canta a bella canzona « Le tourbillon de la vie», davanti à a presidente di a ghjuria, Jeanne Moreau. Una bella stonda d'emuzione.

In novanta sei, face un cuncertu privatu per l’associu « Rêves », à prò di i zitelli malati. Vanessa Paradis hè a cumare di st’associu.

Dopu, Vanessa Paradis si pianta appena di cantà è face una carriera cinematografica. Rivene nant’à a scena musicale in duiemila, cù u discu « Bliss », scrittu per a prima volta, da parechji cumpunidori : Alain Bashung, Mathieu Chédid, Franck Monnet è ancu Johnny Depp

Dopu a sortita di stu discu, Vanessa Paradis face parechji cuncerti, giri è participeghja à numerosi festivali, cum'è e Francofolies. Canta dinù a canzona principale di u filmu "Le petit poucet" rializatu da Olivier Dahan, hè a cumare di u prugettu « Ma chanson d’enfance », è canta cù Charles Aznavour in u discu « Bon anniversaire Charles » ! In u duiemil’è è quattru, hè l’attrice principale di u filmu « Atomik Circus », è canta sei canzone di u filmu, canzone scritte da The Little Rabbits.

Sin’à u duiemil'è sette, Vanessa Paradis face sopr’à tuttu l’attrice. Rivene à a musica cù u discu « Divinidylle », scrittu sopr’à tuttu da Mathieu Chédid, ma dinù Brigitte Fontaine, Alain Chamfort, Jean Fauque o Thomas Fersen. Stu discu hè un successu in Francia, soprattuttu cù e canzone « Divinidylle, Dès que j’te vois è l’incendie », eppo li face ottene dui premii à e vittorie di a musica. U giru a porta in più di trenta cità, à u Zénith è l’Elysée Montmartre. In listessu tempu, cuntinueghja a so participazione cù altri artisti è altri prugetti : face duie riprisentazione di a fola musicale « Le soldat rose » realizatu da Louis Chedid ; canta cù Ben Harper è cù Albin de la Simone.

In u u duiemil’è nove, esce u so primu « Best Of » cù qualchì titulu ineditu, trà di elli a canzona « Il y a », scritta da Gaêtan roussel.

In u duiemil’è dece, escenu dui dischi induve Vanessa Paradis canta : Couleurs sur Paris di u gruppu « Nouvelle Vague », è « Dr Tom ou la liberté en cavale », un discu di a fola musicale scrittu da Franck Langolff.

In listessu tempu, face un giru acusticu. U discu « Une nuit à Versailles », ripiglia stu giru acusticu, mà dinù un'antolugia di e so apparizione televisive.

In u duiemil’è ondeci, Vanessa Paradis participeghja à a realizazione di u discu omagiu à Alain Bashung. Inde stu discu, Vanessa Paradis ripiglia a canzona Angora, è Johnny Depp face l’arrangiamenti.

Dapoi u duiemil'è ondeci, Vanessa Paradis ha participatu à parechji prugetti musicali : hà fattu un giru internaziunale, hà cantatu nant’à a scena di « Les Folies Bergères », ha fattu un cuncertu ineditu dopu a prugezzione di u filmu d’animazione « Un monstre à paris », ha cantatu in u discu d’Alain Chamfort è nant’à a scena cù Elvis Costello.