flux RSS

Grégoire

Grégoire Boissenot hè natu u 3 d’aprile di u mil’è nove centu settanta nove in Senlis. Hè u più chjucu di i quattru fratelli. Ingranda è studieghja à u liceu in Senlis, è ottene una licenza di lingue straniere, inglese è alemanu.

A ottu anni, scopre u filmu d’un cuncertu di « i Beatles » è vole cantà. Cù u so fratellone, Ludovic, ampara à sunà u pianoforte. Scrive a so prima canzona per a so amica di l’epica.

In u duiemil’è sette, Grégoire scontra a squadra di « My Major Company », un novu « labellu » cumunitariu, è s’arregistra nant’à u situ internet. Nant’à stu situ, ghjè a ghjente chì paga u discu. Ci vole à guadagnà settanta mila euri per pruducelu. In dui mesi, Grégoire hà i soldi. Certe persone anu datu dece euri, è d’altre sin’à sei mila !

U discu « Toi + moi » esce u vinti dui di sittembre duiemil’è ottu, produttu da trè centu è quaranta sette persone, è ferma dui anni in a classifica di i trenta più famosi dischi venduti ! A ghjente ch’hà datu i soldi, ricupereghja più di vinti volte ciò ch’ella hà datu à l’iniziu!

Sta canzona « Toi + moi », hè scelta per esse a prima canzona di u spettaculu « Les enfoirés font leur cinéma » in u duiemil’è nove.

Parechje canzone stratte da stu discu sò un successu : « Rue des étoiles » o « Nuages ». A canzona « Ta main » hè dedicata à i so dui fratelli morti.Unu, in u duiemil’è dui in un accidente di vittura, è l’altru in u duiemil’è sette.

In u duiemil’è nove, Grégoire ottene u premiu « Talent France Bleu », è l’annu dopu, a so canzona « toi+ moi » hè discu di diamante.

Di ferraghju duiemil’è dece, u so giru hè cumpletu in a Francia sana. Face dui cuncerti in l’Olympia è invita tutte e persone ch’anu produttu u so discu nant’à a tela. A listessa annata, raghjunghje a squadra di « Les Enfoirés » per u spettaculu « La crise de nerfs ».

U so secondu discu esce di nuvembre duiemil’è dece, intitulatu « Le même soleil ». A canzona « Danse » cunnosce un veru successu, è in u discu avemu dinù una canzona cantata cù Jean Jacques Goldman « La promesse ». Stu discu « Le même soleil » hè produttu da a ghjente nant’à a tela, cum'è u primu discu.

In u duiemil’è ondeci, Grégoire canta « Je commence à comprendre », una canzona di u filmu « Titeuf ».

In u duiemil’è dodeci, Grégoire cumpone è scrive cù Jean Jacques Goldman, a canzona« Encore un autre hiver » di u spettaculu di « Les enfoirés ». Grégoire hè un canterinu indiatu è sustene parechji associi: « Les Enfoirés », ELA cù Zinedine Zidane, « Huntington Avenir », o « Tout le monde chante contre le cancer ». Participeghja dinù à numerosi cuncerti : « Concert pour la tolérance », « Les grands artistes chantent pour le Sidaction », « Concert pour l’égalité » o per l’emissione belgica « Televie », chì lotta contru à u cancheru.

D'aostu duiemil’è dodeci, sposa à Eléonore de Galard, è qualchì mese dopu nasce u so figliolu Paul.

Oghje ghjornu, Grégoire appronta u so terzu discu, sempre cù « My Major Company ». Stu discu serà più Rock è deverebbe esce di nuvembre.