Nutiziale culturale

“Prunu, di u to sangue preziosu” à a sala rossa in Purtivechju venneri u 31 di ghjennaghju à 8 ore è mezu

A cumpagnia “Partage de minuit” serà nant’à a scena di a sala rossa in Purtivechju venneri u 31 di ghjennaghju à 8 ore è mezu. Presenterà l’opera bislingua “Prunu di u to sangue preziosu”. Trè amichi, Antò, Barthé è Maria, interpretati da Danae Sepulcre-Nativi, Louis Starace, è Andrea Cossu, riprisentanu ognunu a Corsica cù una metunimia. St’ultima hè una figura di stile chì sustituisce una parolla cù un’altra parolla in leia. U risultatu hè un testu publicatu à l’edizione Immortelles chì puderebbe esse quasi un scenariu di filmu. Sì i persunagi sò pocu numerosi è u decoru minimalistu, u testu permette d’imaginà facilmente a gestuale, i muvimenti di i persunagi nant’à a scena, a manera di parlà corsu. Scritta da Forteleone Arrighi, st’opera teatrale hè fundata nant’à i temi di a viulenza pulitica è simbolica. Dopu à un evenimentu trumatisante, sti giovani devenu sceglie, cum’è parechji anu sceltu nanz’à elli, trà campà ind’a vergogna di u vituperiu o vindicassi cù a viulenza è u sangue.  

Eccu a storia : dopu una manifestazione chì s’hè compia male, sò arrestati in casa soia in modu viulente. Maria hè vittima d’una agressione sessuale da un pulizzeru. Barthé è Antò, davant’à l’addisperu di a so amica, decidenu di vindicalla dopu avè pruvatu à truvà un’altra suluzione vicin’à una giurnalista, un avucatu è u prete di u paese. L’opera hè custruita cum’è una veghja funebre ingiru à una 'tola', u tavulinu tradiziunale induve l’omi assassinati eranu sposti. E donne cantavanu u voceru pè chjamà à a vindetta chì diventa, cù una metunimia, a vindetta di a Corsica. 

Da vede dunque “Prunu di u to sangue preziosu” di a cumpagnia “Partage de minuit” venneri u 31 di ghjennaghju à 8 ore è mezu ind’ a sala rossa in Purtivechju. Un evenimentu ind’u paisaghju culturale è artisticu corsu.