Nutiziale culturale

38a serata di chjam’è rispondi à l’auditoriu di Pigna sabbatu u 28 di dicembre à 5 ore

Site invitati à sti scambii puetichi impruvisati è cantati cù pueti d’ogni età. Una manera di mantene a tradizione di st’arte oratoriu anticu è ritruvassi pè una stonda di spartimentu è risa. A parte da 5 ore, a nova generazione si misurerà à l’anziana. Dopu à 8 ore, una cena à a casa musicale induve i chjama è rispondi si prusegueranu sin’à tardi.
Infurmazione è riservazione (Casa Musicale) : 04 95 61 77 31  –  resa@casa-musicale.org

CHJAMA À I PUETI di Jacques Ferrari di Piubetta

“L’ocellu alisgianincu si n’hè ghjuntu in nu so locale
E cusì a rundinella stende torna e so ale
E cumu e feste sò vicine vi « sueta » un bon Natale.

Per ch’ellu un si spinga mai a fiamma di a puesia
Chì Natale è Capu d’annu sianu sempre in armunia
E chì a riunione in fin d’annata si passi tutta in allegria.

A l’Auditorium in Pigna u vinti ottu dicembre à cinq’ore
Vi invitanu quelli di a casa è a facenu di bon core
Sapendu chì a puesia li vorrete fa onore.

Serete aspettati tutti quelli di u contrastu
Un ci serà micca premiu mancu vi feremu un ritrattu
Ma di contentà a ghjente què sera u vostru fattu !

Què serà u vostru fattu sò chì a fate volenteri
E forse di cantà in Pigna ne serete ancu fieri
Preghendu per chè dumane or sia megliu che eri.”