Nutiziale culturale

Don ch'è rottu. Unità Teatrale hà adattatu in lingua corsa u Don Quichotte di Cervantès. Riprisentazione u 22 d’ottobre in Corti, u 25 in Purtivechju

Don Quichotte permette di riflette assai nant’à l’umanità, l’identità è a cerca di sensu. A storia si passa in u pensamentu cumplicatu di l’eroe più chè in a vita vera. In Don ch’è rottu, l’arti plastichi, a musica, u ballu, u ghjocu d’attore, e mariunette sprimenu stu pensamentu cum’è mutori di a creazione.

L’adattazione di st’opera maestra di Cervantès da Unità Teatrale è diretta da Jean-Pierre Lanfranchi si face cù u teatru d’ogetti è di mariunette. In stu generu di teatru, l’ogetti ùn ò più elementi di u decoru ma riprisentanu persunagi o animali cù quale l’attori anu da dialugà o so in leia. A lingua corsa hè dinù messa à l’onore, a so ricchezza, puesia è umurismu à prò di l’universalità è i so valori salvatrici.

L’opera di Don Quichotte essendu tamanta, u prugettu d’Unità Teatrale si stende nant’à trè episodii in 3 anni postu chì u persunagiu hè presente trè volte : una volta solu, duie volte in cumpagnia di Sancho Panza. Infine, averemu una ripresentazione finale di i trè episodii. Hè statu un travaglione di i cumedienti cù parechji stazii di furmazione cù Marzia Gambardella, cumediente, ballarina è mariunettista ind’a famosa cumpagnia Philippe Genty, creatrice di spettaculi di teatru cuntempuraneu fundatu nant’à e mariunette.

E prossime riprisentazione : marti u 22 d'ottobre in Corti à 8 ore è mezu, Spaziu Natale Luciani 7 corsu Jean Nicoli è venneri u 25 in Purtivechju à 6 ore è mezu, spaziu Jean-Paul de Rocca Serra, carrughju Fred Scamaroni.