Nutiziale culturale

A leia chì ci leia, u novu dischettu d’Eric è Jeff Mattei

Stu novu dischettu hè un veru omagiu à a Corsica, mischjendu puesia è musica. 11 tituli novi scritti da i dui artisti chì ci trasportanu in i paisaghji è e tradizione di l'isula. Si parla cum’ellu hè scrittu in u so titulu di leie. A leia trà tutti l’elementi di a natura, u ventu, u mare è a terra in a canzona « Capi Corsu ». A leia trà i pastori è u mondu misticu ind’è « Pastori Celesti », quella di u cantadore cù u mondu à l’ingiru cun « I ghjorni cusì ». A leia trà a realità di u mondu è quellu di i sogni cun « Avia messu i mo sogni ». Trà a Corsica è a Sardegna ind’è « Isule Picce ». Trà u fattu d’« Avè » è u fattu d’« Esse » cù « À chì vale d’avè ». A leia trà u mondu paisanu è a cità cù « Maria và ». A leia trà una pecura è u so pastore ind’è « U lamentu di a pecura tosa ». A leia dinù trà u ghjornu è a notte cun « Di notte ».

Tutte ste canzone in leia cù a canzona di u titulu « A leia chì ci leia », sta leia nata u primu ghjornu di vita cù u so babbu, a so mamma è u mondu. L’amicizia chì sbuccia cum’un fiore ‘ssu primu ghjornu di scola. Si parla sopratuttu d’amore, d’amore di a so terra, di i soii, di sta Corsica.