Nutiziale culturale

Amori, u novu dischettu di Jean-Charles Papi

Stu novu dischettu hè una loda à l'amore in tutte e so forme. In u filu di i dischetti di u canterinu, riprisenta d'incantu u so universu cù ritimu, gioia, emuzione, sunurità pop tradiziunale è etniche. Via u so ADN artisticu. Stu prugettu di dischettu mettendu in risaltu u tema di l'amore hè anzianu in u spiritu di Jean-Charles Papi. Eppuru, hà avutu bisognu di sperienza, di maturità pè riesce l'opera. L'amore, sintimentu universale, cumplessu è intimu chì pò incantà e nostre vite ma dinù strughje e nostre anime. Prima, avemu temi presentendu a so visione di l'amore, di l'amicizia, è di leie d'anime chì traversanu i mondi è i tempi. L’amore figliale hè riprisentatu ancu ellu, e so emuzione è u campà persunale di l'artistu. Eppuru, l'amore pò esse in leia cù l'addisperu è e tragedie per via di l'amore delusu, di a separazione, di a perdita d'una persona cara è di i so scunvuglimenti intimi ind'e nostre vite cantati quì cù assai sensibilità è pudore.

E canzone sò state scritte da Michel Mallory pè cantà l'amore fora di e cunvenzione suciale è di u matrimoniu pè esse rimpiazzatu da una cerca perpetuale di smaravigliamentu è di surprese. D'altrò, Jean-Frédéric Terrazzi hà scrittu unu di i tituli maestri di u dischettu : « Sola via », una sola via pè sprime un chjassu cumunu. Amori hè dinù l'occasione di cullaburazione artistiche cù giovani autori è cumpunidori attalentati chì facenu a ricchezza di a nostra isula, per esempiu un duettu cù Yoann Casanova, finalistu di The Voice, induve ognunu canta in a so lingua rispettiva pè un dialogu musicale novu. A tempu, truvemu adattazione in lingua corsa di duie famose canzone : « Je suis malade » di Serge Lama è à tempu un omagiu à stu monumentu di a canzona francese chì hà ispiratu Papi è « Avant de nous dire adieu » ch'ellu canta cù Jeane Manson.

Sta nova aventura musicale si ferà cù un giru principiendu cù trè grandi cuncerti in Corsica pè un viaghju musicale oniricu, festivu è numerose surprese l'8 di nuvembre à u teatru di l'Empire in Aiacciu, u 9 à a sala rossa di Purtivechju è u 23 à u teatru di Furiani ma altre date seranu annunziate. Infine, si pò cumprà u dischettu o a chjave usb nant'à u situ jeancharlespapi.com