Nutiziale culturale

Bastia : mostra di disegni Pierrot Guidicelli, a Corsica à l’entre di l’anni 90 Trà risa & malincunia sin’à u 6 di dicembre

Sin’à u 6 di dicembre, RCFM hè fiera è cumossa di spone sti disegni à l’Arsanale è in i so lucali, spaziu Petru Mari di a citadella di Bastia. Un’iniziativa permessa da a so sposa Vannina chì hà accettatu di sparte i disegni di u so maritu smaritu tragicamente u 5 di maghju 92 durante a catastroffa di Furiani. Tecnicu di RCFM, era dinù un disegnadore passiunatu pè i giurnali naziunalisti U Ribombu è Paese.

Ogni settimana, ci cummentava l’attualità di modu scherzosu - puru s’ella era un’epica difficiule. In sta fine di l’anni 1980, si sente un certu disincantu in Corsica: u Riacquistu hà lasciatu a piazza à tempi più scuri, induve e lotte pulitiche è suciale fermanu forte, ma sò purtate avà da partiti è muvimenti clandestini chì cumencianu à fraià si. Ancu di grazia chì Pierrot, paisanu è Bastiacciu di u Mercà maneghja cusì bè a macagna quant’ a mina, è ci rigala fiure stuzzicaghjole da mantene a risa.

In sta cullezzione, avemu 200 disegni trascelti evuchendu parechji sugetti. In particulare, a pulitica è e mutazione suciale cù disegni macagne, u FLNC è l’eletti. Vannina Bernard-Leoni, a cumissaria di a mostra, spiega chì “sti cummenti è sta derisione anu datu a so libertà à l’artistu è à e so opere”. Avemu ancu una parte più persunale di Pierrot Guidicelli. Si sente a so malincunia in certi persunagi sfaccendati di e fasce figurative in neru è biancu. 

Da vede dunque a mostra Pierrot Guidicelli, a Corsica à l’entre di l’anni 90 Trà risa & malincunia à l'Arsenale è à RCFM, Spaziu Petru Mari - Citadella di Bastia, da u marti à u sabbatu, da 10 ore di mane à 5 ore di sera sin’à u 6 di dicembre.