Nutiziale culturale

'Chjerchju di vita' di Vitalba pè i vint'anni di u gruppu

Diciottu canzone, frà quesse dodeci nove, invitati, voce nove pè un'opera chì si vole più intima, pè qualcosa chì hà sensu di pettu à ciò ch'elli anu campatu è ciò ch'elli volenu campà. Hè menu felice, più malinconicu chè i dischetti di nanzu. U gruppu brama di più armunie chì permette di piazzà megliu e voce.

U primu titulu 'E mio mani eppo tù' hè l'ultimu rimessu à Toussaint Montera. Si sente a so voce. A so sparizione, tuttu ciò chì u gruppu hà campatu dapoi cinque anni è stu dischettu, ghjè qualcosa di tristu è di felice à tempu cù a suddisfazione d'avè tenutu è cuntinuatu. In 'Chjerchji di vita', ùn anu micca rivuluziunatu a musica ma appena quella di u gruppu. Frà e voce invitate, François Aragni, Francine Massiani, Petru Santu Guelfucci, Jean-Claude Acquaviva, Jean-Louis Achard... L'autori di e canzone sò dinù Jean-Claude Acquaviva, Lisandru Gambini è Maddalena Massiani.

Vitalba: un quartu discu, un antru passu. Forse u più difficiule chì avemu persu per istrada un pocu di ciò ch’è no simu quandu Toussaint si n’hè andatu. Ma puru, simu quì cun ellu à fiancu à noi. Aldilà di l’ultimu rigalu musicale ch’ellu ci hà fattu è ch’è vo pudarete sente, hè prisente in ogni canzona di stu doppiu discu. Sin’chì Vitalba cantarà, cantarà ellu dinù. Hè per quessa ch’ella hè impurtante, di tantu in tantu, di piglià u tempu di nutrisce a mimoria, di lascià una traccia. Perchè noi, ùn simu micca eterni, ma e canzone, qualchì volta, sì.
Indu sti dischi, ci truvarete a nostra malincunia, u nostru bisognu di fà sorge a tristezza chì ci hà abbracciatu quella statina di 2018. Ma ci truvarete dinù tutta a forza cumuna chì ci move dapoi sempre è a nostra brama di sparte ciò ch’è n’avemu in core cù tutti quelli chì a vularanu fà cù sincerità è passione. Dodeci canzone nove è qualchì una più anziana accumudata cù u nostru spiritu d’oghje.

Vulemu ringrazià tutti quelli chì anu datu una manu per aiutacci à fà stu passu in più. Sianu cù i so scritti per Maddalena Massiani o Lisandru Gambini, u so ingegnu musicale per Jean-Claude Acquaviva o a so voce per Petru Santu Guelfucci (Di mele è di sale), Jean-Louis Achard (L’isula sola), Pierre Angeli (A maghjera), François Aragni (Duve sò ? è Machja corsa), Francine Massiani (Ti tengu cara è Duve sò ?) è torna Jean-Claude Acquaviva (Machja corsa).

Eccu ciò ch’è no vuliamu dì per prisintavvi sta pagina nova di u nostru libbru cumunu. Ciò chì ferma à scrive, a faranu e canzone…