Nutiziale culturale

Cuncorsu di nuvelle Alleghjaci 2025 sin'à u 31 di maghju

Quist’annu, u tema hè : « mi piacenu i paesi induve ci hè bisognu d’ombra ». Un sugettu in leia cù u prossimu festivale « Leghje u mondu » chì hà da creà un punticellu trà a Corsica è Napuli, dui universi avendu leie storiche, culturale, linguistiche è artistiche. L'organisatrice Catherine Vernaz, spiega chì a nuvella hè l’arte di u rumanzu cortu cù una fine inaspettata. A frasa « mi piacenu i paesi induve ci hè bisognu ombra » serebbe di u scrittore Stendhal ma ùn hè micca stata cunfirmata. Ghjera u so stile, u so spiritu è rimanda à i lochi chì li piacianu. Cusì dice l’associu Altaleghje nant’à u so situ internet. D’altronde, a Corsica è Napuli sò paesi induve ci hè bisognu d’ombra.

A ghjuria di stu cuncorsu hè presidata da u scrittore Robert Colonna d'Istria. L’altri membri sò Alain di Meglio, chì ùn si presenta più, Wilfried N'Sondé, scrittore in residenza, Magali Jakob-Loué, François Cucchi, Simon-François Mozziconacci, Ivan Torreadrodo, Agathe Bauzon è Thimothy Lombard Kirch, tutti premiati à u cuncorsu 2024. Si pò cuncorre in e categurie menu di 18 anni è adulti in e lingue corsa, francese è quist’annu dinù in talianu. E nuvelle ùn devenu francà i 6000 segni. Ci vole à mandalle nanzu u 31 di maghju à concoursaltaleghje@gmail.com. Rinsignamenti : 06 11 20 23 51. Quelle chì sò premiate seranu lette à u publicu durante u festivale « Leghje u mondu ». À tempu, hè organisatu u premiu annuale di i lettori di e bibliuteche. Stu premiu hè attribuitu in cullaburazione cù e mediateche è bibliuteche di Bunifaziu, Prupià, Petretu Bicchisgià, Purtivechju è Ulmetu. Trà u 10 è u 27 di ghjugnu, l’aderenti di sti stabilimenti culturali puderanu leghje e nuvelle finaliste è vutà pè u so testu preferitu. U regulamentu di u cuncorsu hè dispunibule nant’à altaleghje.com.