26 di lugliu
Da un'isula à l’altra, u novu dischettu di Stefanu Pinelli
Stefanu Pinelli hè monda cunnisciutu in l’universu di a musica corsa. Dapoi più di vinticinque anni, hà fattu a so strada inde gruppi cum’è « Dopu Cena », « Contraversu , « Zilimbrina », sunendu ogni volta di ghitarra, busucchì è mandulina. « Era zitellu quand’aghju avutu a mo prima mandulina rigalata da babbu, spiega l’artistu, ma era troppu difficiule di sunà. L’aghju messa da cantu. A musica tradiziunale ? Una lascita di me arci missiavu Martinu dettu « Martitinu » chì sunava di viulinu in paese di u Pighjolu. À dilla franca, ùn mi sò mai messu à issu strumentu quì ma e radiche sò sempre quì ! » Di fattu, Stefanu hà da stà parechji anni nanzu d’esse arradicatu à u so ceppu musicale maternu. Prima li piacia u pop rock è u blues di Mark Knoppfler (Dire Straits), Eric Clapton the « King » è David Gilmour (Pink Floyd). « Ci n’hè statu tanti è tanti, aghjusta u musicante, aghju sempre avutu un gustu particulare per u pop rock è u blues. » Hè in tempi di i so studii, in Corti à u principiu di l’anni 2000 chì e « sirene nustrale » sò vultate. « E mo radiche paisane, a musica di u mo arci caccaru è u riacquistu... »
Hè cusì chè Stefanu Pinelli aghjunghjerà u gruppu « Dopu cena » (musica tradiziunale) cù parechje veghje, cuncerti in Corsica. Hè quì dinò ch’ellu cerca à fà un mischiu di a musica corsa è quella di a so zitellina. Cù una passione particulare per a musica irlandese.
« Aghju un veru rapportu intimu cù l’Irlanda, m’hè sempre piaciuta issa terra è issa musica, masimu dopu avè seguitatu à Knoppfler dopu à a so partanza di u gruppu Dire Straits. Mi sò ancu messu à e creazione à u busucchì è a mandulina. »
Dopu à u gruppu « Contraversu » (ancu s’ellu face sempre parte di a squadra), Stefanu Pinelli hà fattu a scelta di travaglià qualchì tempu fà, nantu à un dischettu dedicatu solu à a mandulina. « Un strumentu chì mi piace assai è ch’aghju ripigliatu cù i gruppi induve aghju sunatu è songu sempre. » Cusì hè nata l’idea di u so novu dischettu « D’un’isula à l’altra ». Un ponte musicale trà Corsica è Irlanda chì seria, d’una certa manera, u riassuntu di vinticinque anni di musica è à tempu, un mischiu di e so duie passione musicale. U dischettu mette ghjust’à puntu, in vale, e duie musiche. Quattordeci tituli accunciati da ellu stessu è accumpagnati à a ghitarra, u busucchì o u viulinu da une pochi d’amichi : Micheli Solinas, Dumè Tomasi è Pasquale Joly. Avemu « Un mischiu di pezzi tradiziunali corsi cum’è « Cuntradanza di pedigrisgiu », “S’è tù voli o Catalì », « Uliosa », canzone irlandese « Glasgow reel », « Maidrin Rua » è dinò qualchì creazione, « Stradella »... »
Un dischettu chì hà dumandatu quattru mesi di travagliu è una settimana di registramentu in i studiò « Ricordu ». Dopu à l’esciuta di dischettu, l’artistu hà da passà avà à a so prumuzione cù qualchì cuncertu in parechji paesi. L’occasione di sente un artistu di qualità.
Origine : Journal de la Corse
Artisti
Festivale Arte in machja i 6, 7 è 8 di settembre
30 d'aostu | Venacu
Camini in Corsica sana: l’arte in core di i paesi corsi
16 d'aostu | Macà Croci, Bilia, Olmu, Santa Lucia di Tallà è Altiani
Lettera di a luna, u novu dischettu di Chjar di Luna
30 di lugliu | Corsica
A leia chì ci leia, u novu dischettu d’Eric è Jeff Mattei
26 di lugliu | Corsica
Mostra Luce etrusca - Parures féminines étrusques à u museu d'Aleria
24 di lugliu | Aleria
Mostra Corsica Rumana à u museu di Bastia da u 6 di lugliu à u 21 di dicembre
5 di lugliu | Bastia
U prugettu Umani Terra di u canterinu Vincent Colonna, dettu La petite culotte
2 di lugliu | Mondu
A mostra “Tribbiera” à e vigne Culombu di Lumiu
2 di lugliu | Lumiu
A mostra 'Acqua, l’eau dans tous ses états'
2 di lugliu | Bastia è Corti
Mostra “Nozze in Mediterraniu” ind'a caserna Padoue di Corti sin’à u 31 d’ottobre
28 di maghju | Corti
Seconda biennale d'arte cuntempuraneu De Renava sin'à u 2 di nuvembre
10 di maghju | Bunifaziu
L'affrescu di storia è di memoria in Cervioni
24 d'aprile | Cervioni
Noi, u primu dischettu di u gruppu L’Avvinta
23 di marzu | Corsica
Eterna lotta, u novu dischettu di L’Arcusgi pè i so 40 anni
16 di marzu | Corsica
A pruduttrice aiaccina di cinema Marie-Ange Luciani, premiu Daniel Toscan du Plantier 2024
17 di ferraghju | Parigi
'A me lengua', un dischettu in lingua bunifazinca
21 di dicembre | Corsica