Nutiziale culturale

Doria Ousset à l'Eurovisione di e lingue minuritarie 2022

Dopu à Jacques Culioli in u 2008 è u gruppu Dopu Cena in u 2012, Doria Ousset hà da riprisentà a Corsica à l'Eurovisione di e lingue minuritarie cù a canzona 'Roma' ! Eccu un festivale chì face prò ! U cuncorsu Liet (European song festival for regional and minority languages) previstu u 13 di maghju di u 2022 hà da offre una nova mostra à a lingua corsa à u livellu internaziunale.  Creatu in u 2002, issu show prupone à varii artisti muderni di u mondu sanu di cantà in lingua soia (lingue dette minuritarie di pettu à quelle di i paesi maiò). In u 2008, Jacques Culioli avia vintu u premiu di u festivale cù a so canzona 'Hosanna in excelsis'.

Esciutu in u 2009, u cantu hè un mischiu di tradizione è di mudernità cù sunurità assai varie. Ci rammenta a storia di quelli suldati corsi di Roma tumbati dopu à un azzuffu cù l'imbasciatore di Luiggi u XIV in u 1662 in a Cità eterna. Scrittu da Paul Turchi-Duriani, messu in musica da Alexandre Oliva è Julien Muraccioli, eccu un lamentu rock chì ci porta nantu à l'ale di a nostra storia, accumpagnatu d'un videoclip trementu fattu da John Paldacci. Doria Ousset (dischetti 'Realità', 'Rabbia' è 'D'un cantu à l'altru') hè una di e nostre più famose canterine di l'isula. Figliola di Rusiu è di Tolosa, scuperta da u publicu quand'ella cantava cù I Chjami Aghjalesi, sta donna corsa di prima trinca hè impegnata assai à prò di a difesa di a nostra lingua è di u nostru populu, prupunendu ogni volta un'alchimia tamanta trà mudernità è tradizione.

In cumpagnia d'una squadra di musichenti di qualità (Marina Luciani à u pianò, Antoine Leonelli à a ghitarra, Bernard Ferrari à a ghitarra elettrica, Jean-Alexandre Oliva à a cetera, Jean-Marie Giannelli à a bassa è Jean-Paul Maurizi à a batteria), Doria hà da purtà a Testa Mora à u cuncorsu Liet è, cù tuttu u so talentu, cù tutta a so passione, ne simu sicuri, ci hà da arrecà a so vittoria ! Forza, o Dò, simu cun tè ! Eccu i ligami di u so situ : www.doria-ousset.com è di u cuncorsu Liet : www.liet-international.com

Origine : U Ribombu aprile di u 2022