Nutiziale culturale

I 300 anni di a nascita di Pasquale Paoli cù u storicu Antoine-Marie Graziani

Quist’annu serà l’annu di u trecentennariu di a nascita di u Babbu di a Patria, Antoine-Marie Graziani, prufessore d’università, hè statu numatu riferente di l’organisazione messa in ballu da a CDC. L’occasione di sparte u so sapè cù a cummissione per assicurà un aspettu storicu precisu à l’evenimenti chì anu da fiurisce quist’annu. U prufessore n’hà fattu u spostu in l’articulu di Véronique Emmanuelli (Corse-Matin)

I prugetti seranu numerosi, una mostra Paoli in Merusaglia cù parechji fochi incesi in lochi sfarenti, prugetti dinù nu u a pieve di Rustinu, locu d’arradichera  per Paoli.

U storicu intervenerà in cunferenze è scambii: in Genuva d’aprile, Capi-corsu è Casinca st’estate. Evenimenti chì addunisceranu parechji circatori. 

Antoine-Marie Graziani chì hà publicatu pocu tempu fà un ottesimu vulume nant’à e currispundenze di Pasquale Paoli, insiste nant’à à l’appartinenza di Paoli à e figure di i Lumi, ramentendu chì di limità sta perioda à e figure francese di st’epuca seria una tuntia. Si deve ragiunà altrimente per capisce fenomeni maiò di a storia cum’è a revoluzione americana o francese, si deve capisce e suttilità di a persunalità di Paoli, un omu d’una grande umanità, ciò chì s’affacca nù e so currispundenze.

Per compie u storicu hà dinù rammentatu ch’ellu ci hè sempre da scopre nant’à u persunagiu è ch’ellu prusegue è so ricerche approntendu un novesimu vulume di currispondenze.

Dice dinù chì Paoli è a so leia stretta cù a demucrazia ponu ancu serve oghje ghjornu à a riflessione nant’à u mudellu sucietale, vultendu à e so radiche.