Nutiziale culturale

Pè celebrà st'anniversariu, u merre di Biguglia Jean-Charles Giabiconi hà annunziatu un festivale di i filmi pulitichi, Camera pulitica, da u 20 à u 24 di nuvembre cù una cumara famosa : l’anziana ministra Roselyne Bachelot. I filmi seranu tradutti in lingua corsa. Parechje tematiche seranu à u prugramma : l’impegnu puliticu, è tematiche in leia cù a Corsica o quella cum’è i Corsi, citadini di u mondu. Una manifestazione chì s’assumiglia à Arte mare. Pè animà sti dibattiti, u giurnalistu Christophe Bourseiller hè statu sceltu. Hè statu cunsiglieru edituriale di l’anziana emissione culturale “Ce soir (ou jamais !)” presentata da Frédéric Taddei, è intervene regularmente nant’à France Inter. Ci puderebbe esse dinù un’altra persunalità di u giurnalismu.

 

In quant’à u prugramma 2024-2025 di u centru culturale Carlu Rocchi, vi prupone teatru, cuncerti, stand-up, filmi duppiati in lingua corsa è tant’altri… Frà l’evenimenti, a lingua corsa di sicuru à l’onore cù i cuncerti di Jeff et Éric Mattei u 18 d’ottobre, Cirnese u 29 di nuvembre, i Chjami Aghjalesi pè i so 40 anni u 17 di ghjennaghju, duie serate in omagiu à Carlu Rocchi, l’8 di dicembre è 25 di ghjugnu. I filmi Terminator 2 in lingua nustrale l’8 di ghjennaghju, U cantu di u mare u 6 di nuvembre. D’altrò, i festivali Arte Mare è Cine Donne i 27 di settembre è 9 di marzu, l’80 anni di Tao-By l’11 ottobre, u spettaculu Solo di l’imitatore Marc-Antoine Le Bret u 10 di ghjennaghju. Infine, u teatru cù “Hernie fiscale” d’Ali Vardar, cù Franck Leboeuf, l’anzianu ghjucadore francese è campione di u mondu o Sherlock Holmes l’11 d’aprile cù Le signe des quatre, adattazione teatrale di Christophe Delort.