Nutiziale culturale

I trent’anni di carriera d’Eric Fraticelli è u so novu spettaculu What happened ?

Umuristu, attore è rialisadore, Eric Fraticelli ricolla nant’à a scena à parte da u mese di ferraghju pè 14 riprisentazione di u so novu spettaculu “30 anni, what happened ?” cù scenette è nuvità. Serà ghjucatu in Corsica è in altri lochi di u mondu. Una nova sperienza nant’à a scena nanzu di vultà à u sinemà cù dui novi filmi : unu rialisatu à tempu à u spettaculu è l’altru cum’è rialisadore di u so quintu filmu. A dumanda “what happened ?” rimanda à ciò chì s’hè passatu durante sti trent’anni, à e video di l’artistu nant’à e rete suciale. Eric Fraticelli hà sempre avutu bisognu d’esse nant’à a scena ma u so spartitempu ùn li permettia micca. In stu novu spettaculu, parla di cose universale chì cuncernanu tutt’ognunu ma cù a manera soia. Preferisce lascià a surpresa di u spettaculu à u publicu è ancu à i so tennichi. Si sà solu chì daretu à a risa, ci hè una critica di a sucetà, i so sprupositi. Ghjè un sguardu è un risentitu fundatu nant’à l’osservazione di a vita d’ogni ghjornu. Un duminiu chì li dà assai ispirazione. Riservazione nant’à https://ericfraticelli.com/.

In quant’à i prugetti di filmu, u prossimu serà a seguita di “Permis de construire”. Deverebbe esse rialisata à u mese di marzu pè chjamassi “Permis de détruire”. Un altru filmu deverebbe esse rialisatu à u vaghjime. Eric Fraticelli hà principiatu cù Jacques Leporati in u famosu duettu “Tzek è Pido”. Hà rialisatu filmi chì anu avutu assai successu : Permis de construire, Le clan, Inestimable. Hà ghjucatu dinù in telefilmi, serie, documentariu.  Hè dinù l’autore è u rialisadore di u spettaculu di Jean-François Perrone.