Nutiziale culturale

In Cervioni, cullegianti ricustituiscenu un scontru trà Pasquale Paoli è James Boswell

I 300 anni di a nascita di Paoli chì seranu celebrati sin’à a festa di l’Immaculata Cuncezzione è di a Nazione l’8 di dicembre sò stati dinù celebrati in Cervioni da l’elevi di quinta bislingua G2 di u cullegiu Filippu Pescetti. Anu ricustituitu u scontru trà u babbu di a patria è u scrittore scuzzese James Boswell. Una stonda pocu cunnisciuta ma fundatrice di l’epupea paolista. A tempu, una manera viva di fà dialugà memoria, cultura è giuventù.

Guidati da i so prufessori Poli è Ciccoli, i cullegianti anu trovu infurmazione in u testu d’una cunferenza di a storica inglese Dorothy Carrington in u 1982 à l’ADECEC. A cunferenzera cuntava precisamente  stu scontru, accadutu in u 1769, trà Boswell, un giovanu ammiradore ghjuntu da Scozia è u generale corsu di un populu luttendu pè a so libertà. “A croce di Paoli apria e porte di l’Europa” ramenta unu di l’insignanti. Sta frasa hà ispiratu l’elevi chì anu decisu di fanne u core d’un travagliu di ricustituzione teatrale in corsu è francese. Cullegianti, cuscenti di a participazione di Cervioni à a storia paolista in particulare cù a stallazione di a Stamperia Naziunale in cunventu San Francescu, chì anu vulsutu fà rinvivì sta scena storica. À parte da u racontu di Boswell è e riflessione di Dorothy Carrington, anu scrittu è interpretatu scenette di a ghjunta di Boswell in Corsica, a so traversata di u Mediterraniu è u so scontru cù Paoli. Ogni elevu interpreteghja un persunagiu, è cusì face rinvivì st’amicizia inaspettata chì facia entre u babbu di a patria in l’imaginariu europeu di i Lumi.

U prugettu, filmatu in i carrughji di Cervioni serà presentatu in fine d’annata. Altru chè un eserciziu sculare, hè una messa in scena d’una stonda induve a Corsica facia sente a so voce aldilà di i mari. I giovani anu fattu un veru travagliu di trasmissione è ramentatu a memoria d’un cumbattu pè a libertà.