Nutiziale culturale

Libri Mondi à u museu di Bastia i 13,14 è 15 di settembre

In Libri Mondi, da l’iniziu, pruvemu à truvà un equilibriu suttile, quand’è no appruntemu u nostru prugramma. Hè sempre listessu piacè di dà à e Bastiacce è i Bastiaccii a furtuna di scuntrà i grandi nomi ch’elli ammiranu, ma hè ancu più forte di prupone li di scopre autori è autrice di gran talentu, ch’ùn anu sempre a rinomina ch’elli meritanu. Hè bella longa a lista di l’invitati annunziati in Libri Mondi senza intusiasmà tantu i lettori, ma, grazia à u so talentu, è a curiosità di u publicu isulanu, anu sappiutu fassi una piazza accantu à nomi più cunisciuti, è prufittà da tandu d’un letturatu fidu in Corsica. Ghjè quessa, si spera, chì face tutta a forza di issi scontri literarii. Difende i libri, l’autori è autrice chì ci piacenu, senza altru criteru di scelta chì a qualità di u so testu. È a forza di u so prupositu.

Venneri u 13 di settembre, 6 ore è mezu, scontru cù Jérôme Ferrari. Sei anni dopu a paruzione di u rumanzu À son image, ghjè oramai a so adattazione à u cinema chì face l’evenimentu di sta rientrata litteraria è dinù a publicazione di u so nuvesimu rumanzu “Nord Sentinelle”. U primu di trè libri chì u nome di a seria si chjama “Contes de l’indigène et du voyageur”.

Sabbatu u 14 parechji scontri : à 4 ore, Arthur Nersesian, rumanzeru americanu, prufessore di litteratura in New York. 5 ore è quartu a giurnalista è rumanzera Monica Sabolo, grande premiu di l'eruina Madame Figaro 2023 pè u rumanzu “La Vie clandestine”. 6 ore è mezu, appuntamentu cù Jean-Baptiste Andrea, scrittore, scenaristu è rialisadore francese chì hà ricevutu parechji premiii pè a so pruduzzione litteraria. Dumenica u 15, 4 ore, scontru cù Richard Krawiec, scrittore americanu di rumanzi, puesie, cronache in giurnali. Dà corsi di scrittura è travaglia assai vicinu à e persone senza casa o in e prigiò. 5 ore è quartu, scontru cù Giosuè Calaciura, scrittore, giurnalistu. U so rumanzu u più cunnisciutu hè Borgo Vecchio, publicatu in u 2017, è chì hà ricevutu u Premio Volponi 2017 è u premiu litterariu Marco Polo Venise 2019. 6 ore è mezu: Ivy Pochoda, rumanzera è nuvellista americana. U so primu rumanzu hè publicatu in u 2009. Hà ricevutu parechje distinzione pè a so attività litteraria.