Nutiziale culturale

Nostalgia di u passatu, u quartu dischettu di Sissi Palandri

Hè esciutu u quartu dischettu di Sissi Palandri cù 17 canzone chì cantanu e radiche di una Corsica chì si perde. Ciò chì si ritrova in u titulu “Nostalgia di u passatu”. Sissi Palandri hà cumpostu è scrittu a magiurità di i tituli. Alain di Meglio è Rigolu Grimaldi n’anu scrittu unu ognunu. Ci hè dinù una ripresa di “Poca scenza” cantata da Carlu Rocchi è una puesia di Pampasgiolu in leia cù l’origine niulinche di u canterinu. L’artistu trova l’ispirazione in u so passatu, quellu di a Corsica, di u Niolu.

Una vicinanza naturale trà a ghjente, u fraiutu è una vita quasi in cumunità. Una di e canzone hè un omagiu à a so sposa partuta à l’altru mondu, un’altra à una canzona ch’ellu cantava u babbu di Sissi Palandri, un’altra à un amicu sparitu ancu ellu. Ci hè dinù una versione riorchestrata di A Culomba bianca. Dunque, un dischettu pè viaghjà in u passatu, circhendu un tempu più simplice, micca più faciule, ma sicuramente più veru.