Nutiziale culturale

Parolle è usi di a terra in Corsica - L’agricultura in Corsica : lingua, tradizioni è sapè fà

Hè stata urganizata una ghjurnata  intornu à u prugramma NALC-BDLC da u laburatoriu LISA (UMR 6240, Università di Corsica - CNRS) in cullaburazione cù l’associu ADECEC in ghjiru à l’apertura di a mostra « Parolle è usi di a terra in Corsica - L’agricultura in Corsica : lingua, tradizioni è sapè fà ».

Pà riacquistà è cunnosce i sapè tecnichi tradiziunali è linguistichi, sta mostra hè un invitu à trascorre u mondu agriculu tradiziunale cù stratti di racolte di terrenu è dati analizati nant’à u pianu linguisticu.

A mostra hè cumposta da 9 pannelli tematichi è da un pannellu di prisentazione di u prugramma Novu Atlanti Linguisticu è etnograficu di a Corsica (NALC) – Banca di Dati Lingua Corsa (BDLC) da u quale hè ricacciatu u materiale mustratu.

Issa mosta si pò scopre sin’à u 30 di settembre à u museu di l’ADECEC in Cervioni.

Intervenenti à a ghjurnata di prisentazione di a Mostra

Stella Retali-Medori, Maestra di cunferenzie Università di Corsica

U lessicu agriculu

U prugramma Novu Atlante Linguisticu è etnograficu di a Corsica - Banca di Dati Lingua

Corsa (NALC-BDLC) esiste dipoi una quarantina d'anni via un partenariatu CNRS - Università P. Paoli. S'ammenterà a piazza dedicata à u lessicu agriculu dopu ad avè presentatu u quadru generale di u prugramma di ricerca. A so cunferenza hè stata  illustrata in particulare da esempi chjappi ind'u duminiu di a cultura di a castagna.

Ghjacumina Tognotti, Inginieri di ricerca, Laburatoriu LISA A cultura di a vigna in Corsica : usi è parulle

Sfarenti parolli corsi chì toccani à i parti di a vigna, à i vindemii è à u vinu sarani prisintati à

u liveddu di a semantica, di l’etimulugia è di a sparghjera geografica.

Spiigazioni nant’à u travaddu di a tarra, a racolta è l’adopru di l’uva sarani puntiddati da

l’ascolta di tistimunianzi arrighjistrati cù anziani vignaghjoli corsi.

Elise Muglioni, Dutturanti, Laburatoriu LISA 'Da a terra à u paghjolu : un assaghju linguisticu'

Ind’è e sucietà tradiziunali a cucina corsa hè in leia cù e stagione è l’agricultura hè unu di i so puntelli. Tandu pruvaremu à mustrà cum’è u fruttu di isse culture hè accunciatu da a cucina corsa tradiziunale.

Daniele Mortato, Dutturanti, Laburatoriu LISA 'Detti meteorologici e  calendariali corsi: un approccio geo-paremiologico'

I detti è i pruverbii liati à i sfarenti 'tempi' di l’agricultura ponu esse definiti cum’è una vera 'scienza pupulare', è riprisentanu una testimunianza etnologica di primura ; Un paragone trà i pruverbii liati à e previsioni meteorologiche chì mintuvanu i nuvuli è quelli nant’à u periudu di fiuritura di l’alivu, cù i dati scientifichi chì avemu oghje.