Nutiziale culturale

Sustenite a petizione pè l’iscrizzione di u chjam’è rispondi ind’u patrimoniu culturale immateriale !

Un gruppu di travagliu chì addunisce u Centru Naziunale di Creazione Musicale VOCE di Pigna, l’ADECEC, l’Associu chjam’è rispondi è a sucetà civile (Assemblea di a Ghjuventù, pueti, cercadori, studianti, insignanti) hà presentatu una dumanda vicin’à u Ministeru di a Cultura pè l’iscrizzione di u chjam’è rispondi à u Patrimoniu Culturale Immaterialel (PCI).

U chjam’è rispondi hè presente in Corsica dapoi i tempi i più anziani. Hè diventatu assai pupulare in l’anni cinquanta grazia à u talentu d’impruvisadori famosi. Ancu s’ellu hè menu praticatu à parte da u 1980, s’hè mantenutu sin’à oghje in particulare in u rurale grazia à l’associ culturali è novi pueti canterini. 

L’impruvisata puetica cantata hè ricunnisciuta è studiata in u Mediterraniu da associ di pueti, ricerca universitaria è integrata dapoi una vintina d’anni in parechji prugrammi in rete (Ghjurnate internaziunale di a puesia in Tuscana, Prugrammi europei INCONTRO ; DUELO...).

 A u Paese bascu è à e Baleare, numerosi travaglii di ricerca è di sperimentazione in i stabilimenti sculari anu mustratu l’utilità di u chjam'è rispondi pè tutt’ognunu è a sucetà sana. In Corsica, travaglii universitarii cunfirmeghjanu l’interessu di mantene è sviluppà a pratica di u chjam’è rispondi vicin’à e giovane generazione. Sustenite dunque sta petizione nant’à u situ change.org pè mustrà l’interessu di a sucetà corsa à prò di st’iscrizzione à u patrimoniu immateriale!