Nutiziale culturale

U canterinu di I Mantini hà publicatu un libru di trè fole in lingua corsa ind’u parlà bastiacciu pè fà ride è cantà i giovani lettori. L’opera serà presentata à u Petit M, 19 carrughju César Campinchi in Bastia u 18 di settembre.

 

Dopu e canzone macagne, Daniel Vincensini hà sceltu di fà surride un altru publicu : i zitelli cù “Trè fole macagne” illustrate da Léa Maurizi. Si tratta di Bù và bè, Puzzà pè è Nasu rossu. testi inventati da l’autore è mettendu in scena principi è principesse. Cusì, conta in modu umuristicu a storia di a principessa chì si fighjava tutti i ghjorni in u so spechju è chì si ripetia 'Bù và bè comme je suis belle'. A seconda fola “Puzza pè” hè a storia di a principessa chì hà da tumbà un mostru grazia à u so gattivu odore è salvà u so reame. Infine, l’ultima fola hè quella d’un principe natu cù u nasu rossu è chì sunniava d’esse un pagliacciu. Daniel Vincensini l’hà impruvisate pè i so figliulucci piuttostu chè di leghjeli fole tradizunale. A so adattazione in musica rialisata da una figliola di u canterinu hà fattu principià u prugettu.

 

Qualchì annu dopu, s’appronta un libru cù l’ambizione di prupone un’offerta pè i sculari di scole primarie è materne. Pè prupone un’immersione in lingua corsa senza cercà una murale à e storie o una critica pedagogica di a sucetà. Cusì, avemu un’opera di vinti pagine cù un QR codice pè stà à sente e fole è dinù canzone. Stu travagliu serà dinù u sugettu d’un prossimu spettaculu musicale.