Pasquale Paoli : l'influenza mundiale d'un patriottu sapiente

A rinomina di Pasquale Paoli, simbulu di a liberazione è di a rivuluzione, era cunnisciuta ancu in paesi assai luntani da a Corsica. I so ideali di libertà è di guvernu anu traversatu e cunfine è ispiratu mosse rivuluziunarie è istituzione in parechje regione di u mondu. Dopu a so disfatta contr’à a Francia, Paoli s’hè esiliatu in l’Inghilterra induve fubbe accoltu cun intusiasmu da l’intellettuali è i pulitichi. E so memorie, ritrascritte da James Boswell, anu spartu e so idee è a so rinomina di difensore di a libertà. Fubbe invitatu in associ intellettuali prestigiosi, frà elli u Literary Club, è s’amicò cù membri influenti di l’alta sucetà. Hà ricevutu dinù una pensione di u Statu inglese cum’è ricunniscenza di u so cumbattu pè a libertà è fubbe unuratu cù un cenutafiu à l’abbazia di Westminster. Cusì, era una di e poche persone micca inglese à esseci cumemurate. 

L’idee è a persunalità di Paoli anu influenzatu i culoni è rivuluziunari americani. In tempu di e lotte pè l’indipendenza di i Stati Uniti, u so cumbattu contr’à un despotu è a so cerca di suvranità eranu un mudellu pè l’organisazione secreta di i patriotti americani chjamata “Figlioli di a libertà” (Sons of Liberty) è altri partiti patriottichi.

Da u 1766 à u 1769, a lotta corsa pè l’indipendenza, in particulare e prove maestre di u Babbu di a Patria, eranu citate regularmente in u Pennsylvania Gazette. Sti raconti incuragianu l’intusiasmu rivuluziunariu in America cum’è un esempiu vivu di resistenza contr’à un putere oppressivu. 

D’aprile 1769, beianu à a salute di Paoli dopu avè mandatu auguri à a realtà. St’azzione era un simbulu di a riputazione di Paoli ind’un cuntestu induve persunalità cum’è William Pitt o John Adams, eranu regularmente celebrati. Oghje ghjornu, numerose cità è lucalità di i Stati Uniti portanu a casata Paoli in umagiu in Indiana, Colorado, Kentucky, Oklahoma, Wisconsin è in Pennsylvania. D’altrò, Joshua Evans creò “The General Paoli Inn”, un’usteria induve si ritruvonu rivuluziunari americani. 

Fora di l’America è l’Inghilterra, l’influenza di Paoli s’hè fatta in parechje sfere internaziunale. I scritti è a custituzione ch’ellu avia fattu aduttà testimuniavanu d’un prugettu di guvernu demucraticu assai mudernu à quell’epuca. Sti testi si sparghjianu in Europa è influenzonu altre rivuluzione è prucedimenti di mudernisazione pulitica. Difatti, anu ispiratu certi aspetti di e custituzione americane è europee. A so participazione è a so integrazione in e loghje massoniche di Londra anu cuntribuitu à rinfurzà a reta di l’idee rivuluziunarie è liberale. A so presenza in sti chjerchji hà permessu un scambiu culturale è puliticu chì hà facilitatu a sparghjera di l’ideali paolisti aldilà di e cunfine naziunale. In più, in certi paesi, Paoli hè firmatu u simbulu d’un cumbattu pè a libertà è l’autodeterminazione. U so percorsu fattu di cumbatti è d’esiliu ispira sempre oghje quelli chì si battenu contr’à l’oppressione pulitica o suciale.

A lascita di Pasquale Paoli si stende dunque aldilà di a storia di a Corsica. Ispirendu i rivuluziunari americani, sustenendu i chjerchji intellettuali lunduniani è traversendu l’Europa grazia à l’idee di i Lumi, ferma una figura universale di a lotta pè a libertà. U so impegnu, u so esiliu in Inghilterra è a tupunimia Paoli à i Stati Uniti mostranu a so influenza glubale cunfirmendu chì i so ideali schjariscenu sempre i dibattiti nant’à a demucrazia è l’autodeterminazione in u mondu mudernu.

Origine: Stampa Paese