Nutiziale culturale

U giru Sinfonicu Corsica in omagiu à Petru Guelfucci di ferraghju 2025 in Aiacciu, Biguglia è Purtivechju

Cù stu sinfonicu Corsica si rializeghja u sonniu di Petru Guelfucci : accumpagnà e so più belle canzone da un orchestru sinfonicu. Ghjè quellu di Saint-Dié-des-Vosges cù i so cinquanta musicanti. Accumpagneranu Petru Santu Guelfucci, Jean Castelli, Stéphane Escoms, Fabrice Andreani, Fanou Torracinta è Hervé Damiani pè un omagiu à Petru, stu grande artistu emblematicu di a nostra isula.

L’8 d’ottobre di u 2021, quand’ellu si n’hè andatu à l’altru mondu, a Corsica pienghjia micca solu un canterinu di prima trinca ma dinù a sparizione di una memoria viva di a so storia, unu di i so riprisentanti i più emblematichi di a so cultura è di a so lingua chì facia à prò di a so difesa è à tempu u so rinnuvellamentu pè dà vita à a creazione. “A cultura senza creazione hè una chjoppula di noce viota” dicia spessu è cun ragiò. In l’anni settanta u rolu di u canterinu hè statu maestru. Addunitu in modu strettu à u Riacquistu chì l’ogettivu hè statu u rimpadruniscimentu di a cultura pupulare corsa, hè membru fundatore di u gruppu miticu Canta u Populu corsu, chì hà datu a so nubiltà à una cultura è à un arte vucale troppu disprezzati. À a metà di l’anni 80, Petru Guelfucci hà prinipciatu una carriera solu è hà avutu tamantu successu cù a canzona Corsica micca solu in l’isula ma ancu à u Québec induve hè sempre oghje una videtta. Forse chì Sinfonicu Corsica puderebbe cantacci. In l’anni nuvanta, Petru hà creatu u gruppu Voce di Corsica, una riferenza di u cantu tradiziunale corsu chì hà ottenutu una vittoria di a musica in u 1995. In l’anni duiemila, hà decisu di fà prò di u salvamentu di a paghjella. Cusì, in u 2009, in Abu Dhabi, stu cantu pulifonicu hè statu iscrittu nant’à a lista da prutege da l’UNESCO. 

St’ultimi anni, Petru era vultatu à a creazione cù in particulare una bella cullaburazione cù Francis Cabrel. U so ultimu dischettu hè un Requiem, arrigistratu prussimamente. D’altrò, Marie Ferranti li hà cunsacratu un libru, Le livre de Petru, fundatu nant’à scambii cun ellu à l’edizione Gallimard. Infine, France 3 Corsica Via Stella li cunsacrerà à mumentu datu un documentariu. Oramai, st’altru omagiu à Petru Guelfucci cù u giru Sinfonicu Corsica di ferraghju 2025 : u 18 à L’Empire in Aiacciu, i 19 è 20 à u Spaziu Carlu Rocchi di Biguglia, u 21 à a sala rossa di Purtivechju.