Nutiziale culturale

U giurnalistu è scrittore Petru Leca premiu Musanostra di a litteratura corsa

Petru Leca riceverà u premiu Musanostra di litteratura corsa l’8 d’aostu in Lumiu durante u festivale E Statinate organisatu da l’associu Musanostra. Hà publicatu qualchì tempu fà a nova racolta di puemi, È u ventu, à l’edizione Albiana. Di e so puesie, ghjè sicuramente Ghjuvan Ghjaseppiu Franchi, l’autore di u prifaziu, chì ne parla u megliu: « Una creazione fatta di carne è di sangue. Intima è prufonda, esigente è scarsa. Una racolta induve l’autore ciotta in fondu d’ellu stessu. Cù puesie chì, ind’a musicalità di e parolle, trovanu un ribombu chì ci rimanda à u nostru passatu, presente, e nostre vite è e nostre stonde e più intime. » Un’opera assai persunale “sicuramente a più intima ma dinù a più difficiule”. dice l’autore.

« Sin’à tandu, trattava piuttostu di situazione sucetale. Cù “Hè u ventu”, hà vulsutu prupone un travagliu d’intruspezzione chì và u più luntanu pussibile in ciò chì custituisce u scrittore ma senza esse nustalgicu. Si tratta d’evucà e lezziò chì a vita ci porghje. Avemu una centinaia di puesie chì trasportanu dunque u lettore in stu viaghju internu nant’à temi varii. Ognunu ci truverà forse elementi chì u scrittore ùn hà micca scrittu o pensatu in ogni puemu, strufata o versi. Petru Leca hè dinù musicante è hà pruvatu à mette musica in e parolle. 

U travagliu custì hè dinù assai assai linguisticu pè fà capì a significazione di ste puesie à i lettori, ma cù parolle forse menu currente di u linguaghju corsu attuale. L’autore hà pruvatu à sprime sintimenti à modu soiu cù vucabulari chì mettenu u lettore mezanu in situazione di ritruvà u piacè di rinsignassi nant’à a significazione di parolle o spressione. In fatta fine, un veru travagliu d’orefice ingiru à a lingua corsa pè ch’ella piaci à l’arechja di u lettore grazia à a so musicalità è à a so scrittura. Puesie chì cummuveranu sicuramente u core di quelli chì e capisceranu