Attualità

U suspettu di a fucilata d’Aiacciu s’hè resu

L’omu suspettatu d'esse l'autore di a fucilata murtale d'Aiacciu chì hà fattu un mortu è sei feriti in a serata di u 23 di dicembre, s'hè resu eri. Identificatu a sera di i fatti, era dipoi attivamente ricercu da a pulizza.

L'omu di 43 anni, cunnisciutu da a ghjustizia, s'hè resu eri dopu meziornu à u cummisariatu d'Aiacciu induv'ell'hè principiata a so guardia custodia. Un infurmazione ghjudiziaria  per prova d'umicidiu è umicidiu hè stata aperta da a procura d'Aiacciu.

Ramintemu chì a fucilata hè accaduta à u caffè Le Lamparo in Aiacciu. Gravamente toccu, Pierre-Louis Giorgi, suldatu di u focu prufessiunale di 33 anni, hè mortu da e seguite di e so ferite. Una baruffa persunale trà a vittima è u tirore serebbe à l'urigine d'issa fucilata murtale.

L'autossia di a vittima deve esse praticata oghje. L'altri feriti frà i quali certi sò sempre uspitalizati, fermanu sott'à surveglianza, ma a so vita ùn hè più minacciata.

A prefettura hà decisu d'un arrestatu di chjuditura di dui mesi à l'incontru di u stabilimentu Le Lamparo.