U musicante François Grimaldi s'hè spintu

Si n’hè andatu François Grimaldi. U jazz corsu hè orfanellu di u so imbasciatore infranasitu. Da a famosa cantina parigina «Le Lamarck» in Montmartre, ch’ell’hà direttu durante anni, François Grimaldi si n’era ghjuntu in Corsica è spartia u so tempu trà Venzulasca è Bastia. A musica è u jazz eranu sempre vicini, cume una filusufia di vita, una manera di campà… U jazz è a so guitarra, l’hà adduniti à a lingua corsa cun un certu successu. U so discu sott’à u titulu « Un si sà mai » esciutu in 2008, nè hè una bella testimunienza.

In 2017, avia creatu un quartet cun Jean-Luc Savelli à u pianò, Pierre Navarro à a bassa, Rudy Pucinelli à a batteria è ellu stessu à u cantu è a guitarra. Un punticellu trà a Corsica è u jazz chì fermerà un bellu esempiu d’universalità musicale è linguistica, purtatu d’un omu appassiunatu. François Grimaldi hà sbandunatu a scena à l’iscumpensu. Sò compie l’impruvisate. Addiu musicante pueta. Riposi in pace.